2015-нче елның эссе бер июль көнендә «Аргамак» вәкилләре Мюнхен шәһәренә җыелды. Танылган тарихчылар Искәндәр Гыйләҗев һәм Рамиль Хәйретдиновның Татарстаннан килүләре җыелышуыбызга сәбәп булды.
Алманиянең татар яшьләре галимнәргә кушылып Пуххайм (Puchheim) шәһәренә юл тотты, анда Беренче дөнья сугышы вакытында чыгышлары белән Рәсәй Империясеннән булган хәрби тоткыннар өчен лагерь урнашкан булган һәм хәзергә хәтле татар солдатларының каберләре белән зират сакланган.
